Entidat di krédito, ofisina di transakshon monetario i.o.
Komo entidat di krédito, ofisina di transakshon monetario i.o. bo ta obligá pa mèldu transakshonnan no-usual na FIU-Nederland. Esei ta pará den e Lei di prevenshon di labamentu di plaka i finansiamentu di terorismo BES (Wwft BES). Bo ta mèldu tantu transakshon hasí komo transakshon ku no ta finalisá ainda (transakshon ku tin intenshon di hasí). Asina bo ta kontribuí na e lucha kontra labamentu di plaka, delito asosiá ku i finansiamentu di terorismo.
Ofisina di transakshon finansiero: un persona ku ta hasi su negoshi di ehekushon di transakshon monetario na benefisio òf riba petishon di terser partidonan, òf ta hasi trabou dirigí riba realisashon di transakshonnan asina.
Transakshon monetario:
a. kambio di moneda òf plaka di papel;
b. pago di moneda òf plaka di papel ora mustra un tarheta di krédito òf ora entrega chèk òf otro papel di balor;
c. ora ku, den kuadro di un transferensia monetario, un hende haña disposishon di fondonan òf balornan monetario, ku e propósito pa – sea den e mesun forma òf nò—hasi esakinan disponibel na un terser partido,
hasi esakinan disponibel òf duna enkargo pa hasi nan disponibel, òf paga òf hasi disponibel pa pago, fondonan òf balornan monetario ku ya a pone na disposishon otro kaminda, sea di mesun forma, si òf no; esakinan ta posibel solamente te kon leu e transferensia monetario ta un servisio para riba su mes;
d. ora ku hasi otro aktividatnan relashoná ku esaki; lo indiká esei via un medida general di gobernashon.
Kompania di invershon: persona hurídiko ku ta pidi òf ku a optené fondonan òf otro merkansia pa invershon kolektivo pa laga e partisipantenan kompartí den e ingresonan for di e invershonnan.
Asuntunan ku sigun e Wwft-BES ta kai bou di e aktividatnan di Instituto di krédito i Transakshon di ofisina monetario i otronan ta:
- Tumamentu den kustodia di papel di balor, plaka di papel, moneda, moneda di papel, metal presioso, i otro balor;
- Habrimentu di un kuenta riba kua por warda un saldo den plaka, papel di balor, metal presioso, òf otro balor;
- Hurmentu di un kaha di heru;
- Hasimentu di un pago pa kobra kupon òf dokumento di bono òf papel di balor similar;
- Kreditá of debitá o sea laga un otro kreditá òf debitá un kuenta riba kua por warda un saldo den sèn, papel di balor, metal presioso òf otro moneda;
- Hasimentu di transakshon monetario den sentido di e Wet financiële markten BES (Lei merkado finansiero BES);
- Fasilitá krédito;
- Dunamentu di krédito den forma di lease finansiero;
- Dunamentu di garantia i fiansa;
- Kompra i benta di:
1°. Instrumènt di merkado monetario inkluso chèk, letra di kambio, i sertifikado di depósito;
2°. Divisa;
3°. ‘Futures’ i opshon finansiero;
4°. ‘Swaps’ i instrumènt semehante di finansiamentu; òf
5°. Papel di balor;
- Partisipashon den emishon di papel di balor i dunamentu di servisio en relashon ku esei;
- Aktua komo kompania di invershon den sentido di e Wet financiële markten BES (Lei merkado finansiero BES);
- Dunamentu di un servisio di invershon, loke ta enserá:
1°. Risibí i pasa enkargo di kliente en relashon ku instrumènt finansiero;
2°. Ehekutá enkargo pa kuenta di e klientenan ei en relashon ku instrumènt finansiero;
3°. Maneho di un kapital individual;
- Aktua komo instituto di moneda elektróniko.
Eksepshonnan;
No ta konsiderá komo servisio manera intenshoná den hasimentu di un pago en konekshon ku kobransa di kupon òf dokumento similar di bono òf papel di balor similar:
a. Risibi fondo òf balor di fondo den kuadro di un pago di prima basá riba un kombenio di seguro, ku e meta pa asina logra ku por pone e sènnan òf balornan monetario, sea den mesun forma òf no, pagabel òf laga otronan pone nan pagabel na un instituto ku, a base di e Wet financiële markten BES (Lei di merkado finansiero BES), a permití pa ehekutá e negoshi di seguro na Boneiru, Sint Eustatius, i Saba;
b. Den kuadro di un pago basá riba un kombenio di seguro, pagamentu òf hasimentu pagabel di fondonan òf balornan monetario, despues ku, sea den mesun forma òf no, a pone e fondonan òf balornan monetario disponibel otro kaminda dor di un instituto ku a base di e Wet financiële markten BES (Lei merkado finansiero BES) tin pèrmit pa ehekutá e negoshi di seguro na Boneiru, Sint Eustatius, i Saba.
Ki ora mi ta mèldu un transakshon?
Bo tin e tarea legal pa ta alerta pa transakshon di bo kliente, i pa mèldu transakshon no-usual. Komo atministradó di un instituto di invershon bo ta na altura kiko ta usual den bo sektor. P’esei abo mes por husga mihó si un transakshon ta no-usual i posiblemente ta relashoná ku labamentu di plaka, delito asosiá ku òf finansiamentu di terorismo. Pues bo huisio profeshonal ta importante.
Tin transakshon ku semper bo mester mèldu, sin importá e sirkunstansianan. Esaki ta transakshon ku ta kuadra ku e indikadónan ophetivo. Akibou bo ta haña un resúmen di e indikadónan ku ta yuda bo evaluá transakshonnan. Ademas e guia general di ministerionan di Finansa i Hustisia i Siguridat i e guia di de Nederlandsche Bank (DNB) ta duna bo hèrmènt pa kumpli ku e lei. De Nederlandsche Bank (DNB) ta bo supervisor i ta kontrolá si bo ta tene bo mes na bo obligashonnan di den Wwft.
Kua indikadó ta yuda mi evaluá transakshonnan?
Tin 7 indikadó ku por ta aplikabel pa atministradónan di instituto di invershon. Ku nan bo por determiná si bo tin ku mèldu na FIU-Nederland. Si e transakshon ta kuadra ku e indikadó ophetivo, e ora ei semper bo tin ku mèldu. Ku e indikadó suphetivo ta partikularmente importante pa bo mes kalkulá si un transakshon ta no-usual.
E deskripshon literal di e indikadónan den e Dekreto di ehekushon bo ta mira akibou. Bo ta usa e kódigonan poné dilanti di e indikadónan, ora di mèldu un transakshon no-usual. Si bo mèldu a base di un indikadó suphetivo, ta importante pa huntu ku bo denunsia, duna un deskripshon amplio den kua bo ta deskribí e transakshon i splika dikon bo ta sospechá ku tin asuntu di labamentu di plaka òf finansiamentu di terorismo.
Servisio manera esnan intenshoná den parti a te ku d, g, i, i p te ku w di anekso A den e lei.
Subjectief01 – “Un transakshon di kua e dunadó di servisio tin motibu pa suponé ku e por tin di haber ku labamentu di plaka òf finansiamentu di terorismo.”
Objectief01 – “Ta lógiko, den kaso di transakshon ku tin konekshon ku labamentu di plaka òf ku finansiamentu di terorismo, ku ta mèldu na polis òf na Ministerio Públiko, pa tambe mèldu nan na e Unidat di Inteligensia Finansiero; ya ku ta eksistí e suposishon ku por tin un konekshon entre e transakshon aki i labamentu di plaka òf finansiamentu di terorismo."
Objectief02 - "Un transakshon giral pa un montante riba USD 11.000."
Objectief03 - "Un transakshon kèsh pa un montante riba USD 11.000."
Objectief04 - "Un depósito kèsh pa un montante di USD 11.000 òf mas na benefisio di un tarheta di krédito òf un instrumènt di pago prepago (tarheta prepago)."
Objectief05 - "Uso di un tarheta di krédito òf un instrumènt di pago prepago (tarheta prepago) en relashon ku un transakshon pa un montante di USD 11.000 òf mas."
Objectief06 - "Un transferensia monetario pa un montante di USD 2.000 of mas, a menos ku ta trata di un transferensia monetario intenshoná dor di un dunadó di servisio ku ta laga reglamentu di e transferensia monetario en kestion pa kuenta di un otro dunadó di servisio riba kua e deber di mèldu intenshoná den artíkulo 3.5, insiso un, di e lei, tambe ta aplikabel."
Bo ta kere ku un transakshon hasí òf ku tin intenshon di hasi ta kuadra ku un òf diferente di e indikadónan akí? E ora ei bo tin e obligashon legal pa mèldu esaki na nos.
Kiko ta pasa ku un transakshon no-usual?
Un instituto ku a mèldu un transakshon no-usual ta risibí outomátikamente un notifikashon, esta un konfirmashon di resepshon. Esaki ta importante en konekshon ku indemnisashon. Nos ta investigá e transakshon no-usual akí. Si despues di e investigashon nos deklará e transakshon akí sospechoso, e ta na disposishon di servisionan di investigashon di krímen, di inteligensia i di siguridat. A base di nan propio prioridat nan ta sigui hasi mas investigashon.