Kolaborashon Nashonal
Mirando e kompleksidat di labamentu di plaka i finansiamentu di terorismo, kolaborashon ta esensial pa FIU-Nederland. Tantu na nivel nashonal komo internashonal, i tantu públiko komo privá.
Prevenshon i kombate di e problemátika aki ta un meta komun di FIU-Nederland i nos partnernan den e kadena. Den e kadena aki, diferente aktividat i esfuerso konsekutivo ta tuma lugá, ku ta kontribuí na logro di e meta. Di mèldu transakshon inusual i analisá e mèldumentu ei, te ku intervenshon manera un barera òf averiguashon, persekushon, i kondenashon di echonan kastigabel, i kita benefisio optené di forma ilegal.
Dunadónan di servisio ku deber di mèldu
Bon kolaborashon ku e dunadónan di servisio ku deber di mèldu ta krusial pa FIU-Nederland. Mèldementu relevante i di bon kalidat ta di gran importansia pa nos, pa hasi investigashon lihé i efektivo tokante posibel embolbimentu di personanan natural i personanan hurídiko den krímen. P’esei, FIU-Nederland tin hopi kontakto ku dunadónan di servisio ku deber di mèldu i nan asosiashonnan di brènch sentralisá i organisashonnan profeshonal. Ademas, nos ta organisá enkuentronan pa gruponan spesífiko ku deber di mèldu, i nos ta parti karta notisiero rondó di temanan aktual.
Supervisornan
Pa supervishon riba bon kumplimentu ku e deber di mèldu, Ministerio di Finansa a indiká algun supervisor. Den kolaborashon ku e supervisornan, FIU-Nederland ta duna informashon na diferente grupo di institushon.
Den e Wwft BES a inkluí posibilidatnan pa interkambio di informashon entre e supervisornan i FIU-Nederland tokante kumplimentu di e deber di mèldu di e dunadónan di servisio ku deber di mèldu. Tin ku regularmente ta hasi uso di esaki.
Servisio di averiguashon, informashon, i siguridat, i Ministerio Públiko
Transakshonnan ku FIU-Nederland a deklará sospechoso, ta kai bou di e Wet Politiegegevens (Lei di Informashon Polisial), i ta pone nan na disposishon di e servisionan (spesial) di investigashon, informashon, i siguridat. Tin kontakto intensivo ku e diferente partnernan tokante kon por saka mas tantu balor posibel for di inteligensia finansiero. Ministerio Públiko klaro ta un partner importante den esaki.
Entidatnan di mankomunidat
Fuera di e kolaborashon eksistente ku partnernan den e kadena, FIU-Nederland tambe ta presta hopi atenshon na eksplorá i hasi uso di formanan nobo di kolaborashon. Fintell Alliance NL i e Financieel Expertise Centrum (Sentro pa Ekspertisio Finansiero) ta ehèmpelnan di esaki. Pa e islanan BES nos ta hasi uso di e konosementu ku nos a haña i e perspektivanan nobo ku ta resultado di entidatnan di mankomunidat semehante.
Den e entidat di mankomunidat públiko-privá Fintell Alliance NL, FIU-Nederland ta traha huntu ku e kuater bankonan di mas grandi di Hulanda: ABN AMRO, ING, Rabobank, i de Volksbank, i dos banko mas chikitu: Triodos i Knab. Nos ta traha huntu ku analista i investigadó di e kuater bankonan aki na ún lokalidat, i ta kompartí perspektivanan ku otro denter di e posibilidatnan hurídiko. Asina nos ta siña di otro, i huntu ta haña mas bista riba retnan kriminal i kon esakinan ta traha.
E Financieel Expertise Centrum (FEC, Sentro di Ekspertisio Finansiero)
Den FEC, FIU-Nederland ta traha huntu ku De Nederlandsche Bank, Ofisina di Impuesto, FIOD, Polis Nashonal, Ministerio Públiko, i Autoridat Merkadonan Finansiero. Nos ta kompartí perspektivanan i ta redaktá asina yama ‘red flag’: indikadó ku ta senalá sierto aktividat kriminal. Dor di ta alerta pa red flag, nos por senalá práktika ilegal den un fase trempan. Asina nos ta fortalesé integridat di e sektor finansiero. Bo por lesa mas tokante esei riba e website di FEC.
Mas informashon tokante nos retnan mankomunidat bo por haña den nos relato anual.