Di kon FIU-Nederland a tradusí su wèpsait na papiamentu?
“Ya kaba nos tabatin un wèpsait spesífiko pa Hulanda Karibense, komo FIU-Nederland (Unidat di Inteligensia Finansiero hulandes) tambe ta e punto di notifikashon aki, kaminda mester reportá transakshonnan no usual. Pero e wèpsait akí ta aksesibel solamente na hulandes i ingles. Ounke hulandes ta un idioma legalmente ofisial riba e islanan, na Saba i Sint Eustatius ta papia prinsipalmente ingles i na Boneiru ta netamente papiamentu. Komo ku e poblashon mas grandi di Hulanda Karibense ta biba na Boneiru i ei ta papia prinsipalmente papiamentu, nos ke a hasi nos wèpsait mas aksesibel pa un públiko mas amplio. Multilingwismo i diversidat ta di balor inestimabel na Hulanda Karibense. Pa e motibu akí nos a sòru pa nos wèpsait ta aksesibel pa tur nos stakeholdernan i residentenan (di Hulanda Karibense), independientemente di nan idioma òf background.’

Kon boso a atendé ku tradukshon di e wèpsait?
Pa e tradukshon di e wèpsait na papiamentu, nos a traha estrechamente ku Rijksdienst Caribisch Nederland (RCN). Pa medio di RCN, nos por a logra kontratá traduktornan profeshonal ku bon dominio di tantu hulandes komo papiamentu pa garantisá un tradukshon eksakto. Tambe nos a purba di tene kuenta ku e matisnan lokal den uso di palabra na papiamentu na Boneiru spesífikamente, pero tambe den mantenshon di e tono i estilo korekto i e tradukshon korekto di terminologia profeshonal spesífiko. Naturalmente, semper ta posibel ku nos a falta algu den esaki. Pa esaki nos ta stimulá pa nos bishitantenan di e wèpsait duna feedback di e wèpsait i nos lo hasi uso di esakinan pa mehorá e wèpsait i añadí kontenido relevante.”

Bo ta un gerente di relashon pa Hulanda Karibense. Kiko eksaktamente e funshon akí ta enserá?
Komo direktor di relashon Hulanda Karibense, mi ta responsabel pa mantené kontakto ku e instituto finansieronan i e otro stakeholdernan na e islanan di Hulanda Karibense. Mi no ta hasi esaki mi so, pero huntu ku un kolega ku ta biba i traha na Boneiru. Mi ròl ta enserá, pa gran parti, e promoshon di kooperashon i mehorá e interkambio di informashon ku e fuentenan ku ta notifiká informashon i nos partnernan di investigashon. Ademas, mi ta hasi análisis di transakshonnan no usual di kua mi ta purba di kontribuí na prevenshon i/òf kombatimentu di krímen.”

Di kon bo a skohe e trabou akí?
“Pasobra mi tin un konvikshon fuerte den e mishon di FIU-Nederland pa kombatí kriminalidat finansiero. Ademas, mi ke kontribuí na seguridat i integridat di e sistema finansiero, i e funshon akí ta ofresé un oportunidat ekselente pa esaki.”

Bo tin un afinidat ku Hulanda Karibense, i di kon?
“Mi tin en bèrdat un afinidat fuerte ku e region Karibense, ku ta bini di mi background personal i eksperiensia profesional. Mi rais ta den Karibe, kaminda mi a krese ku e kultura riku i e diversidat ku e region tin di ofresé. Apesar ku mi ta biba i traha na Hulanda, pa hopi aña mi tabata envolví den proyektonan i formanan di kooperashon den e region Karibense i mas spesífikamente na Hulanda Karibense. E envolvimentu akí a duna mi un bista di e desafionan spesífiko ku Hulanda Karibense ta konfrontá, spesialmente riba tereno di kombatimentu di labamentu di plaka i finansiamentu di terorismo.”

Kon (des)konosí FIU-Nederland ta na e islanan na Hulanda Karibense?
“E reputashon di FIU-Nederland riba e islanan di Hulanda Karibense ta varia. Mayoria di e dunadónan di servisio finansiero, i partnernan den kadena ta bon na altura di nos ròl i tareanan, miéntras otronan posiblemente ta ménos konosí ku nos trabou. Pa esei pues nos ta aspirá di mehorá nos reputashon den e region, esaki ta e motibu ku nos a disidí di tradusí nos wèpsait na papiamentu.”