E komershante di oro
Aktualmente, tin 29 diferente grupo ku deber di méldu, pero Duana nó ta un institushon ku obligashon di mèldu a base di e Wwft. Pero nan ta mèldu sí serka FIU-Nederland.
For di 2007, Duana ta mèldu a base di e Europese Verordening Liquide Middelen (Ordenansa Oropeo Medio Líkido). Un hende ku ta drenta na òf sali for di Union Oropeo i tin EUR 10.000 òf mas na plaka kèsh huntu kuné, mester mèldu esaki. Keda sin mèldu ta kastigabel.
Aña pasá, Duana Schiphol a yama FIU-Nederland despues di a kontrolá un komershante di oro. E komershante di oro tabatin desena di kilo di oro bieu i plaka kèsh huntu kuné.
Dor di retraso di e avion, Duana tabatin tempu èkstra pa kontrolá un ke otro. Den pasado tambe Duana a yega di mèldu transakshon di e komershante di oro, inklusive keda sin deklará eksportashon di plaka kèsh, i a risibí e notifikashon ku a deklará eseinan sospechoso. Entretantu, tambe tabatin transakshon inusual nobo di otro informante. Despues di investigashon, por a deklará e informashon (di transakshon) nobo sospechoso tambe, i a hasi esaki disponibel pa e instansianan di investigashon.
Entretantu, e komershante di oro a deklará ku e ta biaha ku e oro bieu bai Mediano Oriente, laga nan smèlt e oro pa despues traha hoya di dje ku despues ta bolbe importá na Hulanda. Ta bende e hoyanan ku komershantenan ku ta paga ku oro bieu, asina e komershante a bisa. A base di e deklarashon, e karensia di dokumentashon, i e transakshonnan sospechoso anterior, nan a sospechá e komershante di oro di labamentu di plaka i a traslad’é pa Koninklijke Marechaussee denter di e Kombenio di Kolaborashon Medio Líkido (Samenwerkingsverband Liquide Middelen). E mesun anochi ei, e Koninklijke Marechaussee a invadí e edifisio di negoshi di e komershante di oro. Aki nan a haña desena di kilo di oro i hoya di oro mas, i un gran kantidat di plaka kèsh, ku tambe nan a konfiská.
Nan a detené e komershante di oro i e tabata será pa un temporada, pero entretantu e ta liber den espera di e kaso. Ainda tin bastante pregunta sin kontesta, por ehèmpel kon nan a yega na e kapital inisial, i tokante orígen di e oro. Komo ku e kaso ta kompliká, ku tin diferente pais envolví, i ku ta difikultoso pa un ke otro keda komprensibel, Fiskal a disidí di sigui ku e kaso i investigá esaki por kompleto. Tanten, e artíkulonan ta sigui konfiská.