Ofisina di trust
Komo ofisina di trust bo ta obligá pa mèldu transakshonnan no-usual na FIU-Nederland. Esei ta pará den e Lei di prevenshon di labamentu di plaka i finansiamentu di terorismo BES (Wwft BES). Bo ta mèldu tantu transakshon hasí komo transakshon ku no ta finalisá ainda (transakshon ku tin intenshon di hasí). Asina bo ta kontribuí na e lucha kontra labamentu di plaka, delito asosiá ku i finansiamentu di terorismo.
Servisio di trust : a. na enkargo di un terser persona, ku no ta un terser persona pertenesiendo na un grupo ku e suministradó di e servisio di trust ta parti di dje:
1°. aktua komo direktor òf sosio di un persona hurídiko òf un sosiedat.
2°. ponementu na disposishon di un adrès òf adrès di korespondensia manera intenshoná den e artíkulonan 12, insiso un, parti b, i 13, parti a di e Handelsregisterbesluit BES (Desishon di registro di Komersio BES) na un persona hurídiko òf sosiedat, kombiná ku trabou di atministrashon òf di asesoria.
3°. lanta òf likidá o sea duna enkargo pa lanta òf likidá persona hurídiko.
4°. e echo di ta trustee den sentido di e Tratado tokante e derecho ku ta di aplikashon riba trust i tokante rekonosimentu di trust (Trb. 1985, 141) ku a krea dia promé di yüli 1985 na ’s-Gravenhage.
b. benta di persona hurídiko òf intermediá den esei.
c. hasi uso, na benefisio di esun na ken ta duna e servisio di trust, di un sosiedat ku ta pertenesé na un grupo ku e suministradó di e servisio di trust tambe ta parti di dje.
d. dunamentu di otro servisio ku lo indiká pa medio di medida general di gobernashon.
Asuntu ku sigun e Wwft-BES ta kai bou di e aktividatnan di Ofisina di Trust ta:
Dunamentu di servisio di trust manera ta intenshoná Wet financiële markten BES (Lei merkado finansiero BES).
Ki ora mi ta mèldu un transakshon?
Bo tin e tarea legal pa ta alerta pa transakshon di bo kliente, i pa mèldu transakshon no-usual. Komo atministradó di un instituto di invershon bo ta na altura kiko ta usual den bo sektor. P’esei abo mes por husga mihó si un transakshon ta no-usual i posiblemente ta relashoná ku labamentu di plaka, delito asosiá ku òf finansiamentu di terorismo. Pues bo huisio profeshonal ta importante.
Tin transakshon ku semper bo mester mèldu, sin importá e sirkunstansianan. Esaki ta transakshon ku ta kuadra ku e indikadónan ophetivo. Akibou bo ta haña un resúmen di e indikadónan ku ta yuda bo evaluá transakshonnan. Ademas e guia general di ministerionan di Finansa i Hustisia i Siguridat i e guia di de Nederlandsche Bank (DNB) ta duna bo hèrmènt pa kumpli ku e lei. De Nederlandsche Bank (DNB) ta bo supervisor i ta kontrolá si bo ta tene bo mes na bo obligashonnan di den Wwft.
Kua indikadó ta yuda mi evaluá transakshonnan?
Tin 5 indikadó ku por ta aplikabel pa atministradónan di instituto di invershon. Ku nan bo por determiná si bo tin ku mèldu na FIU-Nederland. Si e transakshon ta kuadra ku e indikadó ophetivo, e ora ei semper bo tin ku mèldu. Ku e indikadó suphetivo ta partikularmente importante pa bo mes kalkulá si un transakshon ta no-usual.
E deskripshon literal di e indikadónan den e Dekreto di ehekushon bo ta mira akibou. Bo ta usa e kódigonan poné dilanti di e indikadónan, ora di mèldu un transakshon no-usual. Si bo mèldu a base di un indikadó suphetivo, ta importante pa huntu ku bo denunsia, duna un deskripshon amplio den kua bo ta deskribí e transakshon i splika dikon bo ta sospechá ku tin asuntu di labamentu di plaka òf finansiamentu di terorismo.
Servisionan manera esnan intenshoná den parti k di anekso a di e lei.
Subjectief01 – “Un transakshon di kua e dunadó di servisio tin motibu pa suponé ku e por tin di haber ku labamentu di plaka òf finansiamentu di terorismo.”
Objectief01 – “Ta lógiko, den kaso di transakshon ku tin konekshon ku labamentu di plaka òf ku finansiamentu di terorismo, ku ta mèldu na polis òf na Ministerio Públiko, pa tambe mèldu nan na e Unidat di Inteligensia Finansiero (FIU); ya ku ta eksistí e suposishon ku por tin un konekshon entre e transakshon aki i labamentu di plaka òf finansiamentu di terorismo."
Objectief22 - "Tur transakshon kèsh ku ta riba e montante di USD 5.000 òf balor di esaki den divisa strañero ku e persona ku tin e deber di mèldu ta envolví kuné, sea direktamente òf indirektamente."
Objectief23 - "Transakshon di USD 50.000 pariba, inklusive kompra òf kambio dor di kliente di chèk, chèk di biahe, òf medionan di pago semehante."
Objectief24 - "Transakshon di USD 500.000 pariba ku ta envolví chèk, chèk di biahe, òf medio di pago semehante."
Bo ta kere ku un transakshon hasí òf ku tin intenshon di hasi ta kuadra ku un òf diferente di e indikadónan akí? E ora ei bo tin e obligashon legal pa mèldu esaki na nos.
Kiko ta pasa ku un transakshon no-usual?
Un instituto ku a mèldu un transakshon no-usual ta risibí outomátikamente un notifikashon, esta un konfirmashon di resepshon. Esaki ta importante en konekshon ku indemnisashon. Nos ta investigá e transakshon no-usual akí. Si despues di e investigashon nos deklará e transakshon akí sospechoso, e ta na disposishon di servisionan di investigashon di krímen, di inteligensia i di siguridat. A base di nan propio prioridat nan ta sigui hasi mas investigashon.