Atministradó di Entidat di Invershon
Komo atministradó di un entidat di invershon bo ta obligá pa mèldu transakshonnan no-usual na FIU-Nederland. Esei ta pará den e Lei di prevenshon di labamentu di plaka i finansiamentu di terorismo BES (Wwft BES). Bo ta mèldu tantu transakshon hasí komo transakshon ku no ta finalisá ainda (transakshon ku tin intenshon di hasí). Asina bo ta kontribuí na e lucha kontra labamentu di plaka, delito asosiá ku i finansiamentu di terorismo.
· habri un kuenta disponibel riba kua por warda un saldo di sen, papel di balor, metal presioso, of otro balor;
· hürmentu di un kaha di heru;
· hasimentu di un pago relashoná ku kobransa di kupon òf dokumento similar di bono òf papel di balor similar;
· kreditá òf debitá o sea laga kreditá òf debitá for di un kuenta riba kua por warda un saldo den forma di sèn, papel di balor, metal presioso, òf otro moneda;
· hasimentu di transakshon monetario den sentido di e Wet financiële markten BES (Lei merkado finansiero BES);
· fasilitá krédito;
· suministro di krédito den forma di lease finansiero;
· otorgá garantia i fiansa;
· kompra i benta di:
1°. instrumènt di merkado monetario inklusive chèk, letra di kambio, sertifikado di depósito;
2°. divisa;
3°. ‘futures’ i opshon finansiero;
4°. ‘swaps’ i instrumènt di finansiamentu semehante; òf
5°. papel di balor;
· partisipá den emishon di papel di balor i duna servisio en relashon ku esei;
· aktua komo kompania di invershon den sentido di e Wet financiële markten BES (Lei merkado finansiero BES);
· duna un servisio di invershon bou di kua ta komprondé:
1°. risibí i pasa enkargo di kliente en relashon ku instrumènt finansiero;
2°. ehersé enkargo pa kuenta di kliente en relashon ku instrumènt finansiero;
3°. maneho di un kapital individual;
· aktua komo instituto di moneda elektróniko.
Eksepshonnan:
Komo servisio intenshoná den hasimentu di un pago relashoná ku kobransa di kupon òf dokumento semehante di bono òf papel di balor semehante, no ta konsiderá:
· a. den kuadro di un pago di prima basá riba un kombenio di seguro, risibí fondonan òf balornan monetario, ku e meta pa hasi e fondonan òf balornan monetario aki, sea den mesun forma òf no, pagabel otro kaminda òf laga hasi esaki, na un instituto ku basá riba e Lei merkado finansiero BES tin pèrmit pa ehersé e kompania di seguro na Boneiru, Sint Eustatius, i Saba;
· b. den kuadro di un pago basá riba un kombenio di seguro, pagamentu òf hasimentu pagabel di fondonan òf balornan monetario, despues ku a hasi e fondonan òf balornan monetario aki disponibel otro kaminda, sea den mesun forma òf no, dor di un instituto ku a base di e Wet financiële markten BES (Lei merkado finansiero BES) tin pèrmit pa ehersé e kompania di seguro na Boneiru, Sint Eustatius, i Saba.
Ki ora mi ta mèldu un transakshon?
Bo tin e tarea legal pa ta alerta pa transakshon di bo kliente, i pa mèldu transakshon no-usual. Komo atministradó di un instituto di invershon bo ta na altura kiko ta usual den bo sektor. P’esei abo mes por husga mihó si un transakshon ta no-usual i posiblemente ta relashoná ku labamentu di plaka, delito asosiá ku òf finansiamentu di terorismo. Pues bo huisio profeshonal ta importante.
Tin transakshon ku semper bo mester mèldu, sin importá e sirkunstansianan. Esaki ta transakshon ku ta kuadra ku e indikadónan ophetivo. Akibou bo ta haña un resúmen di e indikadónan ku ta yuda bo evaluá transakshonnan. Ademas e guia general di ministerionan di Finansa i Hustisia i Siguridat i e guia di Outoridat Merkado Finansiero (AFM) ta duna bo hèrmènt pa kumpli ku e lei. De Outoridat Merkado Finansiero (AFM) ta bo supervisor i ta kontrolá si bo ta tene bo mes na bo obligashonnan di den Wwft.
Kua indikadó ta yuda mi evaluá transakshonnan?
Tin 4 indikadó ku por ta aplikabel pa atministradónan di instituto di invershon. Ku nan bo por determiná si bo tin ku mèldu na FIU-Nederland. Si e transakshon ta kuadra ku e indikadó ophetivo, e ora ei semper bo tin ku mèldu. Ku e indikadó suphetivo ta partikularmente importante pa bo mes kalkulá si un transakshon ta no-usual.
E deskripshon literal di e indikadónan den e Dekreto di ehekushon bo ta mira akibou. Bo ta usa e kódigonan poné dilanti di e indikadónan, ora di mèldu un transakshon no-usual. Si bo mèldu a base di un indikadó suphetivo, ta importante pa huntu ku bo denunsia, duna un deskripshon amplio den kua bo ta deskribí e transakshon i splika dikon bo ta sospechá ku tin asuntu di labamentu di plaka òf finansiamentu di terorismo.
Servisio manera esnan intenshoná den parti a te ku d, g, i i p, te ku w di anekso A den e lei.
Subjectief01 – “Un transakshon di kua e instituto tin motibu di suponé ku esaki por tin di haber ku labamentu di plaka òf finansiamentu di terorismo.”
Objectief01 – “Ta lógiko, den kaso di transakshon ku tin konekshon ku labamentu di plaka òf ku finansiamentu di terorismo, ku ta mèldu na polis òf na Ministerio Públiko, pa tambe mèldu nan na e Unidat di Inteligensia Finansiero; ya ku ta eksistí e suposishon ku por tin un konekshon entre e transakshon aki i labamentu di plaka òf finansiamentu di terorismo."
Objectief18 - "Tur transakshon kèsh ku ta surpasá e montante di USD 5.000 i ku e dunadó di servisio di maneho ta direktamente òf indirektamente envolví kuné."
Objectief21 - "Transakshon giral di USD 5.000.000 i pariba."
Bo ta kere ku un transakshon hasí òf ku tin intenshon di hasi ta kuadra ku un òf diferente di e indikadónan akí? E ora ei bo tin e obligashon legal pa mèldu esaki na nos.
Kiko ta pasa ku un transakshon no-usual?
Un instituto ku a mèldu un transakshon no-usual ta risibí outomátikamente un notifikashon, esta un konfirmashon di resepshon. Esaki ta importante en konekshon ku indemnisashon. Nos ta investigá e transakshon no-usual akí. Si despues di e investigashon nos deklará e transakshon akí sospechoso, e ta na disposishon di servisionan di investigashon di krímen, di inteligensia i di siguridat. A base di nan propio prioridat nan ta sigui hasi mas investigashon.