Na promé lugá ta importante pa bo tene kuenta ku konfidensialidat manera deskribí den artíkulo 23 di Wwft. E artíkulo akí ta preskribí kiko si i kiko no ta posibel. Na di dos lugá wardamentu di dato ta importante. Despues di a mèldu un transakshon no-usual, bo ta risibí di FIU-Nederland un konfirmashon di resepshon. Esaki ta e prueba ku realmente a mèldu. E konfirmashon di resepshon ku bo haña, ta pa abo e prueba ku bo a mèldu un òf mas transakshon. Bo mester warda e konfirmashon akí i otro dato importante di e transakshon no-usual 5 aña. Den artíkulo 34 di Wwft ta lesa mas tokante esaki.

Manera ku a splika riba e página Tokante FIU-Nederland nos ta analisá e transakshonnan no-usual despues di bo denunsia pa evaluá si tin sufisiente motibu pa deklará nan sospechoso. Si deklará un transakshon sospechoso, bo ta haña notifikashon di esaki: e asina yamá dissemination notification. Ta importante pa bo no saka konklushon sin mas basá riba esaki. Ta asina ku nos no por kompartí dikon ta deklará un transakshon sospechoso i e motibu eksakto ta keda pues deskonosí pa bo. P’esei nos konseho ta pa mira un deklarashon sospechoso komo informashon adishonal den bo proseso di “konosé bo kliente” i di vigilá transakshonnan. Despues, a base di bo propio posishon di informashon i bo boluntat pa kore riesgo, bo por hasi un evaluashon komo vigilante kon bo ta atendé interno ku e deklarashon sospecho akí.

Bo no ta risibí notifikashon si nos no deklará un transakshon no-usual sospechoso. Ta asina si ku kos ta warda tur transakshon no-usual 5 aña. Komo ku nan ta keda visibel den nos database, mas despues tòg nos por deklará transakshonnan sospechoso. Por ehèmpel debí na denunsia nobo. Si esei sosodé, lo bo tende esei e ora ei di nos.

Tur indikadó relashoná ku Wwft BES ta kuminsá ku un X. (Por ehèmpel X_Subjectief01)

Nos ta realisá nos mes ku komo institushon ku obligashon pa mèldu, bo tin nesesidat di un feedback supstansiá. Mirando e obligashonnan legal di Wwft e opshonnan akí ta limitá. Tin hopi kos di nos trabou ku nos no ta permití di kompartí nada al respekto. Tòg nos ta trata pa duna bo feedback mas mihó posibel. Pa motibu ku aparte ku un feedback por traha motivante, e ta brinda bo posibilidat tambe pa reforsá prosesonan interno i unda ta nesesario, revisá e profil di riesgo di bo kliente- òf produktonan i kumpli mihó ku bo papel komo vigilante. Nos ta hasi esaki na diferente manera:

• Manda notifikashon (mas tantu posibel) pa e institushon ku tin obligashon pa mèldu, ora ku deklará un transakshon ku a mèldu sospechoso. Sinembargo, nos no por informá bo di e motibu di e deklarashon komo sospechoso òf kiko ta sosodé òf no ku e informashon akí durante e investigashon.
  • Publiká kasonan riba nos wèpsait. Kompartí regularmente, a base di ehèmpelnan di den práktika, kasonan konkreto ku kua nos ta trata na informá institushonnan ku tin obligashon pa mèldu mas tantu posibel tokante e forma kon labamentu di plaka i finansiamentu di terorismo por tuma lugá den práktika.
  • Publiká un resúmen anual den kua nos ta indiká e kantidat di transakshonnan sospechoso pa aña kalendario. Tambe nos ta deskribí algun análisis remarkabel ku durante di e aña a bin dilanti.
  • Manda boletinnan informativo. Ku esaki nos ta trata na informá institushonnan ku tin obligashon pa mèldu, tokante entre otro kambionan di lei, tendensia- i fenómenonan i si ta posibel nos ta kompartí tambe señalnan di alerta señalá via e boletin informativo.
  • Duna informashon na institushonnan ku tin obligashon pa mèldu pa medio di presentashon.

No opstante nos ta hasi nos bèst pa tuma mas tantu paso posibel riba e tereno akí, sin duda tin espasio pa mehorashon. Si bo tin idea tokante esei, tuma e ora ei kontakto ku nos.

Pa por ehekutá su tarea di supervishon, e supervisor ta risibí kada trimèster un reportahe for di FIU-Nederland ku ta kontené datonan agregá tokante kondukta di denunsia den e sektor ku e ta supervisá. Komo supervisor bo tin ademas mandato pa por ehèmpel pidi informashon tokante e kondukta di denunsia direktamente serka bo i pa – si akaso kos no kana manera ta deseá – duna instrukshon òf tuma medidanan adishonal. Komo ku e supervisor di Wwft ta esun ku ta evaluá e kondukta di denunsia, e ta e perso tambe na kende bo por akudí ku pregunta tokante kon bo tin ku interpretá e lei i kiko si òf no ta kai bou di Wwft. E supervisornan tin un guia ku nan a skirbi pa yuda e sektor.

FIU-Nederland ta e instansia ku ta implementá Wwft. Nos ta risibí bo denunsia di transakshon no-usual i nos ta e úniko ku akseso na e transakshonnan no-usual akí. Un gran parti di nos koleganan ta okupá nan mes diariamente ku análisis di e transakshonnan akí. Debí na e karakter di sekreto di estado nos no por bai muchu den detaye ku bo, pero esei no ta nifiká ku nos no ta habrí pa pregunta. E pregunta kiko mester mèldu òf no, nos no por kontestá. Pero nos por yuda bo si ku kon bo mester mèldu, kiko bo por hasi pa laga e denunsia ta mas informativo posibel i nos ta trata na duna bo hèrmèntnan ku por asistí bo den bo tarea komo vigilante. Pa esaki semper bo por tuma kontakto ku nos.

AVG ta rekerí un base pa prosesá datonan personal, di kua un base legal ta un di nan. Wwft ta un base legal asina. Komo institushon ku tin obligashon pa mèldu bo ta prosesá datonan personal di entre otro kliente-, representante- i finalmente interesadonan. Esei ta nifiká ku bo tin ku prosesá e datonan personal den e kuadro di Wwft aki pa ehekutá bo investigashon di kliente.

Mester hasi e investigashon di kliente eksigí basá riba Wwft, teniendo na kuenta e stipulashonnan den kapítulo 2 di Wwft. Esaki ta enserá ku mester determiná i dokumentá entre otro identidat di e kliente (por ehèmpel un kumpradó), i eventualmente e interesado final. Basá riba Wwft mester warda e datonan akí 5 aña despues di e transakshon òf despues ku e relashon komersial a terminá. Meskos ta konta pa datonan relashoná ku transakshonnan no-usual.

Konforme artíkulo 19 i 20 di Wwft institushonnan ku obligashon pa mèldu, tin indemnisashon penal i no ta responsabel konforme derecho sivil, si nan ta di buena fe i ta mèldu korekto, kompleto i na tempu. Pa e motibu aki no por pone bo responsabel komo denunsiante pa por ehèmpel daño ku bo kliente sufri komo konsekuensia di bo denunsia. Ademas no por usa tampoko e datonan ku konforme regla bo ta mèldu regla na nos, kontra bo den un investigashon penal.

A base di Wwft institushonnan ta obligá pa mèldu transakshonnan no-usual ku tin intenshon di hasi òf ku a hasi. Si bo faya ku esaki, bo ta hasi bo mes kulpabel na violashon di Wwft. Ora tin asuntu di inkumplimentu intenshonalmente òf no, bo ta hasi bo mes kulpabel na un delito ekonómiko ku tin konsekuensianan mará na dje. Mas informashon relashoná ku apstenshon di denunsia, bo ta haña riba e página Obligashon pa mèldu.

Pa motibu di siguridat ta eliminá kontenido di bo denunsia despues di 24 ora for di e Portal di denunsia. Despues bo ta haña un vershon komprimí di bo denunsia pa wak.

Si bo organisashon ta registrá na FIU-Nederland, bo organisashon e ora ei tin un propio number di identifikashon pa mèldu; e Identifikashon di Denunsiante. Bo por haña bo Identifikashon di Denunsiante bou di ‘Mi detayenan di denunsiante’ den e ‘Portal di denunsia’.

Kon bo ta mèldu un transakshon no-usual bo por lesa riba e página di Obligashon pa mèldu.