Boneiru, Sint Eustatius i Saba ta kai bou di Hulanda Karibense. Tambe ta yama nan e islanan BES.

Mishon

E mishon di FIU-Nederland ta pa huntu ku su partnernan públiko i privá, tantu na nivel nashonal komo internashonal, prevení i kombatí labamentu di plaka, e delitonan basá riba esei i finansiamentu di terorismo, pa asina entre otro garantisá integridat di e sistema finansiero. Komo FIU-Nederland nos ta kontribuí na esaki pa medio di inteligensia finansiero efektivo i dor di senalá  trènt i fenómeno nobo for di trempan, i informá nos partnernan tokante di nan.

Kon nos ta hasi esaki na Hulanda (Karibense)?

E Wwft BES ta menshoná diverso dunadó di servisio ku ta sirbi komo protektor di e sistema finansiero. Nan ta varia di un negoshante den material di konstrukshon pa banko i di kasino pa notario. Tur e protektornan aki mes mester monitòr nan servisionan pa determiná si tin transakshon ku lo por ta relashoná ku labamentu di plaka, e delitonan basá riba esei, i finansiamentu di terorismo. Transakshonnan inusual nan ta mèldu serka FIU-Nederland. Nos ta analisá esakinan pa investigá si tin sufisiente base pa deklará e transakshon sospechoso. Si esei ta e kaso, lo kompartí nan ku e servisionan di investigashon, di informashon, i di siguridat. Di e manera aki, henter e kadena di Wwft (BES) ta  kontribuí na integridat di e sistema finansiero.

Kon e proseso aki ta mustra, bo por mira den e animashon akibou.

Pakiko esaki ta importante?

E sistema finansiero ta amplio, di orientashon internashonal, i inovativo. Esaki ta ofresé hopi posibilidat pa komersio i kresementu ekonómiko. Lástimamente, e posibilidatnan ei no solamente ta kumbiní empresa i siudadano, sino kriminalnan tambe. Pasobra sea ku ta trata ​​​​​​​​​​​​di trafikashon di droga òf arma, froude, abuzu di hende òf krímen kontra medioambiente, praktikamente semper, nan tin di haber ku sèn. Ta e fluhonan di sèn aki ku ta pasa den nos sistema finansiero ku tin un efekto supversivo riba nos sosiedat. Nan ta fasilitá i rekompensá tur sorto di forma di kriminalidat, sòru pa kompetensia desonesto, i ta tacha afektá e konfiansa den nos sistema finansiero. Ounke ta difikultoso pa evaluá e embergadura eksakto, tin investigashon ku ta indiká ku ta trata di vários míles di miónes pa aña. Ta kontra esaki e munisipionan spesial Boneiru, Saba, i Sint Eustatius, i tambe e Entidatnan Públiko i Hulanda, mester tuma medida. Un tarea importante no solamente pa FIU-Nederland, sino tambe pa tur nos partnernan nashonal i den eksterior, manera e protektornan i e servisionan di investigashon.

Kolaborashon internashonal

Kriminalidat ta un problema ku ta surpasá frontera. P’esei, nos ta traha huntu ku mas ku 165 pais rònt mundu ku un sistema similar. Klik aki pa mas informashon tokante e kolaborashon internashonal aki.